22 il bundan əvvəl olduğu kimi, yenə də Şəhidlərin müqəddəs ruhu yad edilir. Bu bizim “Qan yaddaşımız”-ın şanlı bir qəhrəmanlıq səhifəsidir!
20 Yanvar - Vətən uğrunda canlarından keçən şəhidlərini heç vaxt unutmayacaq Azərbaycan xalqının hüzn və şərəf günüdür. 22 il əvvəl xalqımız Qırmızı İmperiyanın "Qızıl ordusu"nun, Sovet hərb maşınının xaincəsinə hücumuna məruz qalmışdı.
Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 1990-cı ilin 20 yanvarında ölkəmizə qarşı ərazi iddiaları irəli sürən Ermənistanın təcavüzkar hərəkətlərindən və keçmiş SSRİ rəhbərliyinin onlara havadarlığından hiddətlənən, Bakının küçələrinə və meydanlarına çıxaraq buna öz qəti etirazını bildirən geniş xalq kütlələrinə qarşı Sovet ordusunun döyüş hissələrinin yeridilməsi Azərbaycanda misli görünməmiş faciəyə gətirib çıxardı. Bu, insanlığa qarşı törədilən ən böyük vəhşilik idi.
Silahsız insanları hədəfə alan bu Terror Maşını uşaq, gənc, qoca, qadın deməyərək onları gülləbaran edir, tanklarla minik maşınlarına hücum edir, evlərə atəş açaraq dinc əhalini məhv edirdi. Kütləvi terror nəticəsində yüzlərlə günahsız vətəndaşın qətlə yetirilməsi və yaralanması totalitar Sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi. Beynəlxalq birlik 1956-cı ilin Budapeşt, 1968-ci ilin Praqa, o cümlədən 1989-cu ilin Tbilisi, 1991-ci ilin Riqa və Vilnüs hadisələrinə müvafiq hüquqi qiymət verdiyi halda, 1990-cı ilin Yanvar hadisələri Moskvanın hanısısa ekstremist qüvvələri zərərsizləşdirmək və guya dinc əhalini qırğınlardan, xaosdan qorumaq üçün atdığı məcburi addım kimi tanındı.
O vaxt Azərbaycan xalqı adından Bakıdan verilən yeganə etiraz bəyanatı Şeyxülislam Allahşükür Paşazadə tərəfindən edilmişdi. SSRİ rəhbərliyinə, habelə BMT-yə, dünya dövlətlərinə ünvanlanan və kəskinliyi ilə seçilən bu bəyanatda 20 Yanvar faciəsinin törədilməsinə görə günahın bilavasitə Kremlin və M.Qorbaçovun üzərinə düşdüyü vurğulanırdı. Həmin günlər Azərbaycan xalqı adından ən ciddi bəyanatı isə Moskvada yaşayan Heydər Əliyev verdi. Mərhum Prezidentin Azərbaycanın Rusiyadakı daimi nümayəndəliyindən verdiyi kəskin bəyanatlar xalqa mənəvi dəstək oldu. Bilavasitə imperiyanın mərkəzində, dünyanın onlarla KİV təmsilçisinin qarşısında verilən bu bəyanat böyük rezonans doğurdu. Milyonlarla insan Bakıda elan edilmiş komendant saatına baxmayaraq, küçələrə axışaraq terrora öz etirazlarını bildirdilər. Xalq Şəhidlərini əlləri üstündə son mənzilə yola saldı.
22 il bundan əvvəl olduğu kimi, yenə də Şəhidlərin müqəddəs ruhu yad edilir. Bu bizim “Qan yaddaşımız”-ın şanlı bir qəhrəmanlıq səhifəsidir !
2012-ci il 19 yanvar tarixində Azərbaycan Respublikasının Prezidenti yanında Elmin İnkişafı Fondunun kollektivi Qanlı Yanvar faciəsində şəhid olmuş qəhrəmanlarımızın əbədi ruhunu anmaq üçün Şəhidlər Xiyabanını ziyarət edəcəkdir. Fondun icraçı direksiyasında Şəhidləri anım mərasimi də keçiriləcəkdir.
Bakı ş.
17-01-2012
EİF-in kollektivi Şəhidlər Xiyabanında
Bakı ş.
19-01-2012
EİF-in icraçi direksiyasında anım mərasimi
Bakı ş.
19-01-2012
